Umsóknarfresti um stofnframlög í úthlutun fyrir árið 2022 lauk nýverið og var töluvert af umsóknum sem bárust frá sveitarfélögum utan höfuðborgarsvæðisins. Húsnæðis- og mannvirkjastofnun vinnur að yfirferð umsóknanna. Stofnframlög eru veitt af hinu opinbera til byggingar eða kaupa á hagkvæmum leiguíbúðum fyrir fólk undir tekju- og eignamörkum.
Alls bárust 15 umsóknir fyrir íbúðir í sveitarfélögum á landsbyggðinni. Heildarfjöldi íbúða á landsbyggðinni sem sótt var um stofnframlag fyrir í úthlutuninni voru 156 íbúðir sem dreifast víða um landið. Flestar íbúðirnar voru á Vestfjörðum eða 40 talsins og á Vesturlandi þar sem þær voru einnig 40 talsins. Heildarfjárfesting verkefnanna nemur nærri 5,4 milljörðum króna.
