Brák íbúðafélag hses. fékk afhent á dögunum 10 nýjar leiguíbúðir á Egilsstöðum. Framkvæmdum lauk á dögunum, en verktakafyrirtækið Esjuslóð ehf. sá um að ljúka frágangi íbúðanna. Íbúðirnar eru nú þegar flestar komnar í útleigu en þær eru sérstaklega áætlaðar fyrir tekju- og eignaminna fólk á vinnumarkaði. Fjármögnun verkefnisins var unnin með stuðningi stofnframlaga ríkis og sveitarfélags ásamt leiguíbúðaláni frá HMS sem var greitt út meðan á framkvæmdum stóð.
Auk þess hefur Brák þegar hafið undirbúning að byggingu fleiri íbúða á Egilsstöðum. Félagið hefur fengið samþykkt stofnframlög fyrir 10 íbúðum til viðbótar, sem munu styrkja leigumarkaðinn á Austurlandi enn frekar.
Brák er rekið án hagnaðarmarkmiða og er ætlað að tryggja tekjulágum fjölskyldum aðgengi að íbúðum í langtímaleigu með því að kaupa eða byggja, eiga og hafa umsjón með rekstri og viðhaldi íbúðanna.
