Það styttist í afhendingu íbúða sem Brák íbúðafélag hses. er með í byggingu við Bauluvík í Stykkishólmi. Unnið er að lokafrágangi og áætlað að fyrstu íbúðir verði teknar í notkun í desember næstkomandi og þá leigðar út til tekju- og eignaminni heimila.
Íbúðir Brákar, sem verða alls 12 talsins í þremur fjölbýlishúsum, eru um 60 til 95 fermetrar að stærð með einu til þremur svefnherbergjum.
Brák íbúðafélag fékk samþykkt úthlutun á stofnframlagi fyrir þetta verkefni í úthlutun HMS árið 2023. Íbúðirnar eru því fjármagnaðar með stofnframlagi frá ríki og sveitarfélagi ásamt sérstöku byggðarframlagi og leiguíbúðaláni frá HMS.
Verkefnið er hluti af Tryggð byggð – samstarfsvettvangi um húsnæðisuppbyggingu á landsbyggðinni.
